This text is part of:
Click on a word to bring up parses, dictionary entries, and frequency statistics
65.
Digressum a Luguduno Vitellium Cluvius Rufus adsequitur omissa Hispania, laetitiam et gratulationem vultu
ferens, animo anxius et petitum se criminationibus gnarus.
Hilarus Caesaris libertus detulerat tamquam audito Vitellii
et Othonis principatu propriam ipse potentiam et possessionem Hispaniarum temptasset, eoque diplomatibus nullum
principem praescripsisset; et interpretabatur quaedam ex orationibus eius contumeliosa in Vitellium et pro se ipso popularia. auctoritas Cluvii praevaluit ut puniri ultro libertum
suum Vitellius iuberet. Cluvius comitatui principis adiectus,
non adempta Hispania, quam rexit absens exemplo L. Arrunti.
sed Arruntium Tiberius Caesar ob metum, Vitellius Cluvium
nulla formidine retinebat. non idem Trebellio Maximo honos:
profugerat Britannia ob iracundiam militum; missus est in
locum eius Vettius Bolanus e praesentibus.
Historiae. Cornelius Tacitus. Charles Dennis Fisher. Clarendon Press. Oxford. 1911.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.