Click on a word to bring up parses, dictionary entries, and frequency statistics
22.
Inter quae sidus cometes effulsit; de quo vulgi opinio
est tamquam mutationem regis portendat. igitur quasi iam
depulso Nerone, quisnam deligeretur anquirebant; et omnium ore Rubellius Plautus celebratur, cui nobilitas per
matrem ex Iulia familia. ipse placita maiorum colebat,
habitu severo, casta et secreta domo, quantoque metu
occultior, tanto plus famae adeptus. auxit rumorem pari
vanitate orta interpretatio fulguris. nam quia discumbentis
Neronis apud Simbruina stagna in villa cui Sublaqueum
nomen est ictae dapes mensaque disiecta erat idque finibus
Tiburtum acciderat, unde paterna Plauto origo, hunc illum
numine deum destinari credebant, fovebantque multi quibus
nova et ancipitia praecolere avida et plerumque fallax
ambitio est. ergo permotus his Nero componit ad Plautum
litteras, consuleret quieti urbis seque prava diffamantibus
subtraheret: esse illi per Asiam avitos agros in quibus tuta
et inturbida iuventa frueretur. ita illuc cum coniuge Antistia
et paucis familiarium concessit.
Isdem diebus nimia luxus cupido infamiam et periculum
Neroni tulit, quia fontem aquae Marciae ad urbem deductae
nando incesserat; videbaturque potus sacros et caerimoniam
loci corpore loto polluisse. secutaque anceps valetudo iram
deum adfirmavit.
Annales ab excessu divi Augusti. Cornelius Tacitus. Charles Dennis Fisher. Clarendon Press. Oxford. 1906.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.